Au manio posapataka kautá sirimana yirityumanka, tabiko uimia kausané yachikoimia tapi tarukapaé niyacheux imoma manu coronavirus-19
Naukiche maibó aiñanai manu yarusirix noxokóx Coronavirus-19 au na noki Bolivia, auná nikixima bama ma monkoka kautá sirimana yirityumanka, aunanintyo kix Santa Kurusix, auná tarukapaé nityakisirikixima bama pooso ui manu noxokóx, champixti tyopiki axibama pooso kusiribo aiñanai imoma manu noxokóx, ta tyopiki champi nuxia axina kautá ané bakurakáx imoma champityo nubataka uiche uxianama tato.
Sané naukiche ui na tarukapaé nityakisirikixima ma monkoka, paika ma ñoñinka tabiko uimia kausané nikiubuma kimenu manu yarusirix noxokóx tyopiki kaimainki sané nisiborikixhimia. Sané urapoití Kiosén Chuvé, axina astaití nityakisirikixima manuma yarukityoxtí tyopiki axtí ta aukitatityo auki manu axipekukimia manum pooso au manu kix.
_ ¿Kausaneampaé na takisirikix au manio posapataka kautá sirimana yirityumanka axina kix nanaiñaintyo ba enaxikia ui manu yarusirix noxokóx covid-19?
Takana manu usuputakai nuxia machepekatáx nanti sané “manu takisirikix uixh uipia bapache nikiubu oñí kimenu manu chuxiampi kuaboti”, au manio posapataka sane isamutema.
Naukiche chiñataikipi manu yarusirix noxokóx namanaiñá bama pooso kuati uimia nanaiñá auki Santa kurusix, pakúx,noseox, nanaiña axina utuburiboma, tyopiki bama pooso au ba posapataka champVxti manama kitu axiba utuburiboma, chitusiupi oemo isané tyopikiche axti axina abaityuxapaé chixobeokapi o tyopiki nanaiñá ane imoma, sané naukiche chimasamunupima ñanaunx nauki ané utuburiboma. Tapi ui manu suichakisiriki ui manu yarusirix noxokóx, chichebopi suiñemo somenoti au kiatax narikikíxh, auikí pox au ñanaunx, chiñataipityo sumutuburibo auki kiatax narikikíh, auki namanaiña samasakatato imó ñanaunx nauki supankitu sumutuburibo.
Sané naukiche namati bama pooso au manio posapataka, ¿kausané utakisiri iyo na uñutuburibo takanaxti champi kix oemo kautá batrabaka, baxiperakatai iyo na kuati auki kiatax narikikíxh? “¿Kausané champi uñutuburibo aukí noyoatoi, uisamunena tato takana bama uyaitaiki tikañé ané niyakiyoxima ataso nikipauxima?”
Auki namati bama pooso imomantoi: tapi basikia uñamenkatai Kuri tato basarai ñanaunx, nauki mankitu naukí ané uñutuburibo auki noyoatoi, tapi utabikatai tatityo ui kiatax yarusirix noxokóx champi uñutuburibo. Sané naukiche manu noxokóx manunekana suiñemo nauki uxia suisiboriki au ba posapataka au na suibesa kix.
Abomaintyo bama masamunuma chama ñanaunx, manama kitu niyakiyoxima bapakitauruma ataso nuxia nikipauxima, ta aboma bama poososoma au Santa kurusix, subakatato au manu suibesa kix, tyopiki au Santa Kurusix aruki nanaiñantai champi suiñemo, suichakisirika auná.
Aximanu yarusirix noxokóx manunekana oemo axti usaka au noesa kix aruki nanaiñantai ané oemo chutakisirikapi tyopiki chumaunxokokapi anentyo utuburiboki.
– Takanaintyo isuputakaimia tato axiba niyubatá bama iñumantaxima tikañé, mapabentekanama imo makiataka bama chisuputakaipima bama auki kiatax narikikíxh.
Axinaintyo kiatáx ta aximanu: kiyauru soboi chama nokitúkimia. Axina chisanempi soboi au manio tyakirux 30 nasikibeka tomenoti. Au manio naneneka ui suichakisiriki ui manu yarusirix noxokóx, supakiyauka chama nokitúkimia chapixti ti sané soboi yopiriki ba 30 nasikibeka.
Champixti kiyauru nanaiñá, tyopiki manu nokitúkimia ubairo ñokianá axiba posirimanaka soeka taá eaná niunx, aximanu kiyauru soboi champiapaé yacheux imó niux; kanapaé axina bachikoikíxh isiuki isuputakaimia bama ma yaika axina ti niyikixipi champiki nimoche uimia tyopiki chisuputakaipima, axina kaima tusiankana tato sukarima.
Axti na chiñataipi manu yarusirix noxokóx coronavirus-19, bama ma yaika kiubupi asuputanema manu nokitúkimia, chisuputakaipimaintyo niyubataxima bama ma yarusirika tikañé, tyopiki tisupiñuñeté sopisamuné axiba sumastai aukiná sumame, sané naukiche ti takirusu supakionko ñome ba nipiakaxima bama yarusirika suiñumantaiki.
Ui na suichakisiriki aipenenosomi nauki uxia tato suisiboriki aibu bama suiposapatoe nauki aximanu ane soboi sopipia sopisamuné aibu bama suisiborisapa.